Stiklað á steinum

Taktu þátt í nærandi fræðslustund fyrir alla fjölskylduna þar sem stiklað veður á jarðfræði Kópavogs og nærumhverfis.

Viðburðurinn hefst í anddyri Náttúrusafnsins þaðan sem gengið verður út í holtið fyrir utan og helstu kennileiti og jarðmyndanir skoðaðar. Krakkar fá skemmtilegt verkefni til að leysa á meðan göngunni stendur og geta að göngu lokinni föndrað einfalt jarðfræðilíkan inná safninu. Stundin ætti því að vera nærandi fyrir fólk á öllum aldri.

Snæbjörn Guðmundsson, jarðfræðingur, leiðir fræðsluna og hefur um árabil frætt almenning um jarðfræði Íslands, meðal annars sem starfsmaður Náttúruminjasafns Íslands, í Vísindasmiðju Háskólans og hjá Endurmenntun.

Jarðfræði Kópavogs er einkar áhugaverð þar sem ísaldarjöklar hafa runnið ofan af hálendinu og frá Bláfjöllum og skafið forn hraunlög höfuðborgarsvæðisins og mótað um leið landslag bæjarins. Í lok síðasta ísaldarskeiðs fyrir um tíu til ellefu þúsund árum hækkaði sjávarstaða á svæðinu og stóð þá holtið, þar sem Kópavogskirkja stendur nú, upp úr sjónum sem eyja úti fyrir landi og sjást þess merki í brimbörðu stórgrýtinu umhverfis kirkjuna. Holtið nefnist Borgir og voru þær friðlýstar sem náttúruvætti árið 1981. Ofan af holtinu má til suðurs líta hið eldvirka gosbelti Reykjanessins en til norðurs fornar megineldstöðvar og nokkurra milljón ára gömul hraunlög í Esjunni og fjöllunum norðan Hvalfjarðar. Hér er því greinilegt margslungið samspil fjölmargra ungra og fornra jarðfræðiferla sem í sífellu skapa og móta landið okkar og hafa gert í milljónir ára.

Aðgangur er ókeypis.

Öll eru velkomin!

Fjölskyldustundir á laugardögum eru styrktar af Menningar og mannlífsnefnd Kópavogsbæjar.