Child Eater - 10 ára afmælissýning!

Íslensk - ameríska hrollvekjan Child Eater er eins konar ástarbréf til hryllingsmynda níunda og tíunda áratugarins og segir frá barnfóstrunni Helen og þeim ógöngum sem hún lendir í þegar Lucas litli hverfur sporlaust úr rúminu sínu eina nótt.

Hún rekur slóð hans djúpt inn í skóglendi þar sem Robert nokkur Bowery er sagður hnupla börnum til þess að éta úr þeim augun. Í kjölfarið fer af stað martraðakennd og óhugnanleg atburðarrás þar sem enginn er óhultur, hvorki fullorðnir né börn.

Á undan myndinni verður sýnd samnefnd stuttmynd Erlings sem var kveikjan að myndinni í fullri lengd. Stuttmyndin var sýnd á fjölda kvikmyndahátíða, þar á meðal SXSW.

Erlingur Óttar Thoroddsen verður viðstaddur sýninguna ásamt tónskáldi myndarinnar, Einari Sv. Tryggvasyni og munu þeir svara spurningum úr sal að sýningu lokinni - og skála á Regnbogabarnum fyrir þá gesti sem vilja staldra við aðeins lengur.